|
والله الا فـارقـت عيـنـي الـنـوم |
ولا اقول غيـر الله يلطـف ابحالـي |
من شايةٍ بالنفـس والبـال مهمـوم |
خمسـة ليالـي ونومهـا ماهنالـي |
ماهي وظيفه شاغره باسـم وارقـوم |
يجـي نهـارن للتقـاعـد نحـالـي |
ولاهي تجاره بيـن رابـح ومحـروم |
ديني وعرضي والشرف راس مالـي |
ولاهي قضيه بيـن ظالـم ومظلـوم |
يغدي ضرمهـا مضمريـن الظلالـي |
ناسٍ تجيب اعلـوم واتـودي اعلـوم |
ولاهمهـا الا كـم سعـر الريـالـي |
مير السبب من صرت للشعر معـزوم |
بحفل اخمشـه ودي بيـوتٍ اجزالـي |
اقولهـا ولانـي بالاجـواد ملـيـوم |
وبأهل الفعايل ماانتظـرت السوالـي |
زمل المحامل وان شكى الضيم مضيوم |
تبـرك لشيـل احمولهـا ماتبـالـي |
نعم البواسل لانتخـى كـل شغمـوم |
من شوفهـم تهتـز روس العوالـي |
تشهد لهـم غزلانـه بيـوم معلـوم |
ساس الفعل والصيت بـاول وتالـي |
صيتٍ تعلا واعتـلا سحـب وانجـوم |
ماهـي سوالـف ولفـت بالمقـالـي |
ياما اعتلوا جرد السبايا علـى القـوم |
وياما احتموا بالسيف حيـل ومتالـي |
ودنياك ياابن ادم بها السعـد معـدوم |
ولامسعـد الا مـن سعـى بالحلالـي |
الحـي وان طالـت لياليـه مايـدوم |
والميت يبعث وان غدا العظـم بالـي |
مادايم الا اللي فنا الفـرس والـروم |
ياعيـال وايـل بعـدكـم للـزوالـي |
وصلاة ربي اعداد شجعـان واقـروم |
عا محمـد المختـار سيـد الغوالـي |
البارحه كنـي مـن النـوم محـروم |
مضيـت ليلـي والروابـع الحـالـي |
هواجسن دقت على القلـب برسـوم |
ذعذع هواها مـن نسيـم الشمالـي |
اجلـس وافكـر بالتفاكيـر واقــوم |
ضاقت عليـا مـن جميـع المجالـي |
قريحتـي فاضـت علـى رد محتـوم |
غدا لهـا وسـط الضميـر اجتوالـي |
حي الصديق اللي على الطيب زيـزوم |
نـال المراجـل واعتـلا بالعـلالـي |
يامرحبا بـه عـد ماتنشـي إغيـوم |
هلت مطرها مـن صـدوق الخيالـي |
من ناشي الوسمي بها الوسم موسوم |
طـاح الربيـع وربعـت بالمفـالـي |
تلقا البيـوت امبنيـه كنهـا إحـزوم |
زانـت إوجيـه مربتيـن الحـلالـي |
من ضافهم يلقـا المعـزه ومحشـوم |
اهـل السمـوت إمسطريـن الدلالـي |
الطيـب مابيـن المخاليـق مقسـوم |
ماناله إلا مـن رقـاء فـوق عالـي |
والطير لاهب الهـوى يكفـخ الحـوم |
فوق الهضاب الشامخـات الطوالـي |
لاهنت ياللـي مرقبـن راس ملمـوم |
فكرك تنجـرس بالبيـوت الجزالـي |
الطيب له عنـدك مضاميـن وختـوم |
كريـم سبـلا بالسنيـن الهـزالـي |
اهديت لي عشريـن يامفنـي الكـوم |
عشريـن الـف ولانقصهـن اريالـي |
هديتـك مثـل العلـم مابهـا اثلـوم |
رفرف علمها فـوق روس الجبالـي |
الناس من خلقت لها احظوظ واسهوم |
والطيب كايد وانـت طيبـك مثالـي |
اصل الصداقـه بيننـا حبـل مبـروم |
تبقاء علـى طـول الدهـر والليالـي |